إعتصام إعتصام حتى يوفى الإعتصام

ملاحظة بسيطة للثورجية : أنا مالأغلبية الصامتة و مندس ماسوني رغم أن كسيبتي حق قهوة و باكو دخان متع غدوة

بعد 14 جانفي صار إعتصام القصبة 1 إلي صلح برشة حاجات وحسن الأوضاع ، بعدها جاء إعتصام القصبة الثاني (بدفع من الحزب الشيوعي و النهضة) إلي ترفعت فيه شعارات ومطالب كنت موافق عليها بنسبة 80% لهذا ساندت هالإعتصام، لكن ما يخفاش عليكم أنهم "غلطوني" كيف قالولي نعملوا مجلس تأسيسي، كان ماشي في بالي بش يجيو ناس يفهموا فالقانون الدستوري ويعملولنا دستور جديد ومش الأحزاب هي إلي بش تكتبوا، ومانيش فاهم كيفاش واحد ينتمي الحزب معين وهو طبيب و إلا مهندس ويقوم يكتب دستور البلاد .. على كل مش لازم نطولوا الحديث خاطر وحلت الفاس فالراس

 هالأيامات فما مشروع إعتصام القصبة 3 (وإلي واضح وما يخفاش على حد أن الإعتصام بدفع من هاك الجماعة ولا يخدم سوى مصلحتهم) ومطالبه

1- إعادة هيكلة الهيئة العليا لتحقيق أهداف الثورة , بتنحية بن عاشور و المطبّعين من الكيان الصهوني و ضرورة تشريك شباب الثورة من كل الأطياف لتحقيق التوازن فيها
2- إقالة كل من وزير الداخلية و وزير العدل
3- استقلالية القضاء
4- محاسبة قتلة الشهداء و رموز الفساد
5- تفعيل العفو التشريعي العام
6- التّمسك بموعد 23 أكتوبر للإنتخابات مع ضمان أن تكونة شفافة و نزيهة و بدون التسجيل, فقط ببطاقة التعريف
7- تجريم التطبيع مع الكيان الصهيوني الإسرائيلي
8- سحب تراخيص الأحزاب التّجمعية
9- إلـــغـــــاء المديونية
10- لا لوصاية أجنبية على البلاد التونسية

باهي موش بش نقول إلي البلاد ولات سويسرا وإلا السويد لكن الإعتصام مطالبه شعبوية ياسر ولا عقلانية أحيانا وما بوسعي سوى رفضه للأسباب التالية

1 - الهيئة العليا لتحقيق أهداف الثورة هي محل توافق وإجماع من أغلب الأحزاب والشخصيات المستقلة إلي فيها وفما حزب العمال الشيوعي رفض يدخل وكان واضح وصريح مالنهار الأول وما لعبش لعبة يمشي و يجي و يجي ويمشي كيما الناس الأخرين..

2 - إقالة وزير الداخلية و العدل وإلا عشرة ماهيش بش تغير حاجة كبيرة لأن الفساد متفشي في هذا الجهاز و في الإدارة التونسية وما على الناس إلي تخدم فالقطاعات هاذي سوى تنظيف ادارتها

3 - قضاء مستقل ما يستدعيش إعتصام خاطر موش بش نعديو شهر معتصمين وبعد يخرجلنا الباجي يقول جوكم باهي هانا نظفنا القضاء ! المسألة لا تعني الحكومة وما على أهل القطاع هذا سوى تصليح اوضاعهم

4 - محاسبة القتلة ( الله لا تباركلهم) مسألة مهمة و واجبة لكن ماهيش بالسهولة إلي يتخيلها البعض وعلى سبيل المثال بش تجيب الكرتوشة إلي ضربها فلان بش قتل الشهيد فلان أو فلتان ماهيش حاجة ساهلة، وفيما يخص رموز الفساد هام جايين فالثنية وبدات محاكمة البعض والبعض مازال وكيما يقول المثل "يا قاتل الروح وين تروح " ما عندهم وين هاربين بإذن الله

5 - العفو التشريعي العام عملوه وتسيبت الناس مالحبوسات وكان فما شكون ما استردش حقوقو كاملة ما عليه كان الصبر لأن المشكل في الإدارة أكثر منه مشكل الحكومة

6 -  التمسك بتاريخ 23 أكتوبر ما يخصش الهيئة متع بن عاشور وإلا كمال الجندوبي فقط وانما يخص الناس الكل وعلى راسهم الأحزاب إلي لازمها ما تحطش العصا فالعجلة وتلعب كيف الراقصة رايحة جاية جاية رايحة وانما تناقش مواضيع هامة تخص الشعب والمواطن البسيط إلي موش لاقي باش يستر روحو و إلي الهوية عربية كانت أو غانية ما توكلوش الخبز 

7 - حكاية التطبيع مع إسرائيل هذي حكاية فارغة عملوها جماعة انتهازيين و ما عندها وين توصل و نسبة كبيرة من التوانسة بما فيهم أغلبية من اليهود رافضين التطبيع مع إسرائيل

8 - فما ناس بش تصدر فيهم ليستا وما عندهمش الحق يترشحوا للإنتخابات القادمة ولمدة 10 سنين لذا فإن التجوع الديمقراطي مشى على روحو و ما تنجمش تمنع مواطن كان ينتمي للحزب هذا أن ينتمي اليوم لحزب أخر في صورة جديدة للتجمع وما عليك سوى عدم التصويت للجماعة هاذم وكان ربحوا صحة ليهم ونكونو برهنا أننا شعب بهيم بالوذنين وسبحان من حرم علينا الحشيش وما علينا كان قبول النتيجة

9 - المديونية حكاية مخطرة لكن ما فماش مفر منها لكن حسب رأيي ماناش في وضع مزري كيما يتصور البعض وما علينا سوى المطالبة بالشفافية من قبل الحكومة ووقتها يعمل ربي دليل على ردت الفعل كيفاش بش تكون

10 - الوصاية تصلح بالناس العاجزة ومش بالشعب التونسي لكن على ما نرى فما ناس مغرومين بشكر نور أو صوت الله على الأرض أو التنويه بديمقراطية دولة بني صهيون وقبول دعوات من أجهزة الولايات المتخذة الأمريكية ...

 المطالب حسيتها شعبوية ياسر وبش تخسرنا في سلاح مهم هو الإعتصام و أحنا صبرنا صبرنا نكملو نصبروا من هنا للإنتخابات ووقتها نطالبوا الحكومة الجديدة بش تحقق ما نطمح إليه وتكون الناس نقصت من الدمغجة  وبعد هالكليمتين بش نكون اليوم 15 جويلية راكش فالبحر نلعب طريح بيتش ونعمللها تكويرة وإلي يحب يعتصم يتفضل من حقو وربي يوجهو خير.

 

   

ما نحبش ننهض والناس هاذم تمثلني

 

في بلادي العزيزة إلي قامت فيها ثورة ناوية تقطع مع النظام البائد الفاسد و... إلخ . نلقى ناس ناوية تعيش في القرن الأول للهجرة و تقطع العلاقة مع الغرب رغم أن الغرب ماهوش باهي للدرجة يولي ملايكة و ماهوش خايب لدرجة يولي شيطان.

راسي تكسر من هالأفكار التي اعتبرها قديمة ياسر و بش ما نطولش نعطي مثال بسيط حسب تجربتي المتواضعة، إذا كان ناوي تقطع العلاقة مع الغرب فإن البلاد بش تعيش فالظلام لسبب بسيط جدااااء ألا وهو أن أغلب المعدات الموجودة عند الستاغ مشرية من عند الغرب، أبداها مالكابل الهنداوي متع الضوء للجهد العالي مرورا بمعدات الإتصال الأمريكية الموجودة في قاعة توزيع الكهرباء وأنت ماشي

لذا نهارت إلي تولي بلادنا تصنع هالمعدات الكل نولي نحكي على قطع علاقات مع الغرب و ما غير ما نجبد المعدات الثقيلة و نحكي على التوربينات إلي تصنع فالضوء .

ما نحبش نزيد نكعرر برشة ونبقى ننقد فالفكر الذي اختلف معه لكن بش ننقد الأفعال أو بالأحرى العمايل !

أيا سيدي خليني نحط الأمور في اطارها، عندنا حزب يحب على دولة الخلافة و قلك إذا كان نربحو رانا بش إنحيو الديمقراطية، الناس هاذم على قد ما نكره فكرهم على قد ما نقدر صدقهم فالقول وانشاء الله ما يمروش للعمل لأن العمل متاعهم رهيب وبش يطيح برشة بنيات فالبلاد ويقضي على عديد الأرواح متع التوانسة إي نعم توانسة موش قورة جايين من بلاد أخرى.

لذا يا شعبي العزيز إلي ناوي منكم على القرن الأول للهجرة يتفضل أهوكا عندو حزب التحرير وإلي ما يساعدوش يتفضل أهوكا عندو برشة احزاب .

وعندنا في ربوع الخضراء ناس اخرين بدلوا فكرهم وولاو ديمقراطيين وحداثيين حسب ما يقولوا :)

أيا سيدي نبداو على بركة الله، الناس هاذم يقولوا أن كل واحد عندو الحق يعتنق الدين إلي يحبوا .. الناس هاذم يقولوا أن من حق السوكارجي يسكر.. الناس هاذم يقولوا أن الماخور موش بش نسكروه وفيه نساء يمارسوا في مهنة تعتبر من أقدم المهن في التاريخ الإنساني و موش حكر على تاريخ المسيح أو اليهود .. الناس هاذم لباو إستدعاء الولايات المتخذة الأمريكية وقابلو السيناتير ماك كاين المعروف بحبه لإسرائيل ونعته للثورات العربية بالفيروس ..

لذا الوخيان إلي يحبوا الشعب الكل مسلم و يحبوا يسكروا الحانات والماخور و يكرهوا أمريكا و إسرائيل ويتشرفوا بهويتهم العربية، يتفضلوا يخدموا عقلهم ويفهموا إلي الناس هاذم ما يعبروش عن آراءهم.

الناس هاذم كيف تبدل رئيس الحكومة المؤقت (الله غالب يا سي الباجي لازمني نسمي الأشياء بمسمياتها ونذكر إلي سيادتك مؤقت ههههه) وبعد التخلي عن مجلس حماية الثورة وتأسيس الهيئة العليا إلي اسمها طويل، الناس هاذم دخلوا فالهيئة.. و بعد النقاشات والعرك تجبدت حكاية العقد الجمهوري و الناس هاذم ما وافقوش على الوثيقة وعلقوا العضوية متاعهم فالهيئة وبعد مدة عاودوا رجعوا ...

الناس هاذم كيف تجبد موضوع قانون الأحزاب والنظر فالتمويلات ولاو فادين مالموضوع و يحبوا يحكيو عالعقد الجمهوري و كيف البقية كبشو ولاو هزوا رواحهم مالهيئة وقالوا ما عندهاش شرعية (و قيل حسب رايهم العادم الهيئة ما يولي عندها شرعية كان بحضورهم) !

لذا الوخيان إلي يكرهوا الكذب و النفاق ويؤمنون بقوله تعالى "إن الله لا يهدي من هو مسرف كذاب" [ سورة غافر: 28] ، يتفضلوا يخدموا عقلهم ويفهموا إلي الناس هاذم ما يعبروش عن آراءهم (اللهم كان هوما زادة منافقين) .

ونتصور مفهوم الكذب والنفاق مفهومين وما يستحقوش توضيح ولو ما عادش نستغرب شيء من الثورجية الأبرار

أخيرا الوخيان إلي يحبوا هالناس هاذم وبخلاف فكرة البنوك الإسلامية وثقافة التكبير ووصف واحد منهم بحبيب الله والعياذ بالله و بعد الإطلاع على التدوينة هاذي للصديق استراث ، يتفضلوا يعطيوني برنامج إقتصادي وثقافي للناس هاذم.

نكمل حديثي وحديثنا قياس بمقولة للدكتور والمفكر التونسي هشام جعيط "إذا كانت هذه النهضة فكيف يكون السقوط"