I'm back in white and black

أيا قلنا السلام عليكم بعد ما يزيد على العام و نص من الغياب عن المدونة, من المؤكد إلي خلال هالمدة صارت باااارشة حاجات كانت تستدعي التدوين أما الله غالب المخ كيف يجمد و يتعلق علاقة وطيدة مع البخل تكون النتيجة غياب من عهد الشامبيونز ليغ الي هزتها ميلانو هههه
خلال هالفترة ماتت ناس و تولدت ناس وتبدلت ناس (منهم العبد لله و الأسباب متعددة و مانيش بش نقوم نحكي عليها خاطر نعرف روحي مانكونش موضوعي كيف بش نحكي و بش نبدى نشوط ونبدع أكثر من اسكندر بالحجري ههه)
و بما أني جبدت نحكي عالبينتوريكيو برا يا سيدي نحكي شوية عالكالشيو و أهم الأحداث الي صارت فالمدة الأخيرة.
كيف العادة و العوايد و بسبب 72 اصابة في اليوفنتوس خلال الموسم الماضي و بسبب الانتدابات المحتشمة و الماليديكسيون الي في جرة مماتي ألا وهي السيدة العجوز , رفع فريق المرتزقة (أو فريق الباستردي كما تحلو لي تسميته) رمز البطولة للمرة 17 في تاريخو والي بش يوليو 16 مع بداية الموسم القادم خاطر وقعت تبرأة اليوفي من تهم الكالشيوبولي.
براف حسب الانتدابات الي صارت للفريق حتى الآن و حسب الكونتاكت الي قاعد يصير مع لاعبين هايلين نتصور الي العام الجاي بش نكونو بلو كمباتيتيف و الباستردي بش يهزوا الكذا و الشيء هههه( العبارة لل بيغ تراب بوي) و بما أني حكيت عالانتدابات لا زمني نقول الي خسرنا عرصة في وسط الميدان و أسطورة من أساطير كرة القدم ألا وهو بافيل ندفيد صاحب الكرة الدهبية لسنة 2003
و بما أني نحكي عالعرص لازمني نحكي على دالة (une dalle) فقدها الكالشيو و الفريق الي نحترمو, الدالة هي مالديني الي ما يستحقش تعريف.
كذلك من جملة البناءات الي خسرها العالم مايكل جاكسون الي مافماش واحد فالعالم ما يعرفوش , تي هو ولد جاري مزال في كرش أمو سمعوه يغنيلو في ثريلر ههههه

أيا يزي مالكورة توة خنمشيو لبعض المتفرقات السياسية من بعض الدول الجربوعية الي كيفنا
الأوضاع في ايران ولات تشبه لحالة مصارن الجيعان , الناس الكل تتلاطخ و برة عاد أش بش يفضها و المؤكد الي ما نيش أنا الي بش نلقالهم حل خاطر الدول التيوقراطية ما فيهاش دواء سوى العمل بما قاله المنورون الله ينورهم و على راسهم المرحوم جان جاك روسو و ذلك بالفصل بين الدين و السياسة و شوف يسلكوها شوف لا, خاطر تاريخهم يدل على أنهم بلابزية و يموتوا على المشاكل. و توة يزيني مالتخضريط جاني النوم والنهار طلع و أنا مزلت فايق و في يدي ساعة نحضر فيها روحي بش نقصد ربي في عطلة صيفية بعد نفخان و مصاءب السداسية الأولى من العام الحالي. أيا نهاركم طيب ونهاري أسعد الأيام هههه

يوم التدوينة البيضاء

مبروك لتونس

نحب أولا نعلم السادة الزوار متع المدونة ألي أنا محب لإحدى الجمعيات الرياضية بالعاصمة ورغم ما هو معروف عن كره العديد من محبي فرق العاصمة للنجم الرياضي الساحلي فاني كنت يوم الجمعة الماضي سعيد جدا بفوز النجم التونسي باللقب الإفريقي الغالي ألي مانجم حتى فريق تونسي يفوز بيه في نسخته الجديدة.
كذلك البارح و بعد ما تفرجت في برنامج بالمكشوف بقناة حنبعل التونسية زدت فرحت أكثر بهذا الانجاز العظيم ألي حققوا النجم التونسي لفائدة الرياضة التونسية و فرحت للانجاز الآخر ألي كنت متغافل عليه وهو الروح الرياضية العالية للتوانسة ألي ما عملوش ما عمل الجمهور المصري كيف خسر اللقب كذلك الصحافة التونسية ما عملتش ما عملت الصحافة المصرية رغم أن الحكام ساهموا و بقسط كبير جدا في خسارة فرقنا لعديد الألقاب و خطف اللقب منها و أذكر بالخصوص الحكم الهايل ألي حرم السي أس أس بطولة إفريقيا وحكام مباريات فرقنا مع أنيمبا.
أيضا نحب نعبر عن أسفي الشديد على الأوضاع المزرية إلي وصلولها المصاروة والحقيقة بأنو القومية العربية و الأخوة إلي نادى بيها زعيمهم "عبد الناصر ظهرت "كذب في كذب" (هذا تعبير قالوا عبد الناصر على بورقيبة وقتلي نادى بتقسيم فلسطين)
وما تتصوروش قداش كنت فرحان "أوي أوي" و قتلي سمعت النشيد الوطني التونسي يتغنى قدام ستاد القاهرة.
و مرة أخرى مبروك للنجم الساحلي و مبروك لتونس، و موتوا يا حساد بالغزول.

Télévision stupide

Depuis longtemps je me demande si c'est normal ce qu'on voit à la télévision arabe et surtout Égyptienne.
Je ne connais pas trop de chaînes de télévision Égyptienne et je ne m'intéresse pas à les voir, mais malheureusement et à chaque fois que je me trouve dans un café je trouve la fameuse chaîne "Mélody Hits" qui me casse la tête et me gonfle tous les muscles du corps!
Je ne vais pas vous demander grand chose mais juste de vous poser quelques questions:

1-Ce type de chaîne de télévision n'est il pas entrain de diffuser une si mauvaise musique au point de perdre "le bon goût et la bonne saveur de la musique"?

2-N'est-il pas entrain de diffuser des publicités si stupide au point qu'on va s'y habituer à ce type de Pub et on devient stupide?

3-En visionnant ce type de chaînes, les annonces et les messages du bas de l'écran vous paraissent normaux??

4-doit-on regretter le temps qu'on passe devant la télé pour regarder ces types de chaînes?

5-à ce point il n'y a plus de taches à faire pour que l'on regarde les bêtises diffusées?

Je ne suis pas un psychologue ou un sociologue pour vous donner des solutions mais je peux vous conseiller amicalement de trouver une auto-solution: avancer dans vos projets,enrichissez vos talents, trouver une activation qui vous rende heureux ou satisfaits en vous épanouissant au lieu de vous mettre de la poudre au yeux!

البهيم

بما أنو اليوم سوم البنزين ارتفع، ننصح جميع لوخيان باستعمال البهيم حاشاكم. لأن البهيم ما ياكلش برشا وما يستحقش تبديل عجلات و قطايع، ما عليكم كان بش تسيبوه ياكل شويا حشيش و ساعات تتفكروه بشريبة ماء.
والله لاني عارف وين ماشي بينا هالواد ألي طحنا فيه.

ووووووه عل عربية

مرحبا يا جماعة،

تفكرت اليوم حكاية حكاها لي صاحبي "حمة" :

قالك يا سيدي زويز وليدات هايلين قاعدين في القطار يحكيوا ، وهاو الحوار اللي دار بيناتهم :

-أسمع راني ﭭادم فلان في عشرة آلاف و مانيش عارف أش نعمل معاه خاتر ماعنديش بش نرجعلوا.

-آه... صاحبي الفلوس تمشي وتجي و العشرة آلاف لازمها توفى و نظرييتوا ليك تتبدل، تصرف بش ترجّعهملوا خير.

يا رسول الله اٍللي يجي ولا يعمل في نظرية.

يا دين الرب ناس دﭭطع في رواحها و تخمم و تجرب و ما يعلم بيها كان اٍللي خلقها بش تنور طريق العمي كيما الزويز هاﺫوما و لآخر دين والديه ما يفرقش بين نظرة و نظرية .

ياخي ماعادش نعرفوا نحكيوا بلغتنا ولينا يا أما بل'فغونسي" بش نْبينوا للآخر أننا مثقفين و اٍلا نحكيوا مالحزام اٍلوطا بش تكون العربية متاعنا موغلة في عربيتها و معبرة أكثر مالعربية متاع المتنبي

بصراحة كرهت العريبة متاع ز..نعن دي...

إن شاء الله نزيد نرجع و نتعمق في مسألة اللغة خاتر ﭭلبي معبي.

الأنتماء

أيا سيدي مرحبا بيكم..

اليوم خدمتلي بش نكتب على مسألة مقلقتني برشا و سبق وحكيت فيها مع ماجد ألا وهي مشكلة الانتماء عندنا ألي ولات أتعس و أخطر مالعنصرية.

الجندوبي يسب الصفاقسي و يقلوا يا محراث و الكافي يسب في الساحلي و يقلوا يا شراب الزيت و الباجي يسب في البنزرتي يقلوا يا خوافة نتوما آخر من استقل في تونس و...و...و

ياخي قولولي بربي ! ناقصة تونس صغر بش دزيدوا تصغروها و تقسموها دويلات دويلات؟

و زيد بخلاف هذا، كيف ترسٌخت عندنا هل أفكار الدنيئة في نظري و زادت تعمٌقت ولاُت تستدعي منٌا الإبداع و التفنٌن و التٌحديث و التجديد، ياخي فتنا العنصرية الجهوية و ردٌيناها في كرة القدم ( أفيون الشعوب على حسب تعبير فيلسوف فرنسي) و أصبح لمكشخ يسب في مُحب "ليتوال" و "الكليب" و الصفاقسي يسب المستيري و...و...

ثم زادت العنصرية تطوٌر وولات تشمل عديد المستويات حتى نخلطوا للعنصرية المحض اٍلي نلقاوها في المعاهد!يقول القايل كيفاش؟

ساهل برشا ،ولات تصير حروبات بين الشعب الدٌراسية في الباك سبور،جماعة الmath يسبٌوا في sciencesو lettres يسبوا في économie و التكنيك يسبوا فيهم الكلُّ و الجماعة تقول عليهم خذاو ال .BAC

حاسيلوا ربي يستر لا دزيد الأمور تتفاقم ويولي الشٌي في المكتب و الكتٌاب.