مسودة الدستور سوّد الله وجوههم

يوم عيد التحول المبارك الشرعي لقيت نسخة من مسودة الدستور (الله يسود وجوه من كتبوه عن بكرة أبيهم)

المسودة هاي موجودة هنا

مانيش بش نتطرق للفصول الكل لكن بش نعطي مجرد رأي بشكل عام وبش نحكي على بعض الفصول إلي شدت انتباهي دون غيرها.

الفصل الأول ما تبدلش ، الفصل الثاني المتعلق بعلم البلاد و النشيد الرسمي و شعار الجمهورية قعد محافظ على نفس الشاكلة القديمة فقط وقعت إضافة كلمة "كرامة" لشعار الجمهورية.

الفصل الثالث يحمل نفس المبادئ العامة لدستور 59 يعني السلطة للشعب و هاك الكلام الرنان.

حتى لتوا ما عنديش مشكل بل على العكس ما انجم نعبر كان على رضائي التام.

لكن بداية من الفصل الرابع نبدا نتقلق بحيث مذكور في الفصل : "الدولة راعية للدين، كافلة لحرية المعتقد و ممارسة الشعائر الدينية ، حامية للمقدسات ضامنة لحياد دور العبادة عن الدعاية الحزبية ."

باهي في حكاية رعاية وحماية الدين والمقدس، حسب رايي الإسلام لا يحتاج لحماية خاطر ما يحتاج الحماية كان الضعيف أو الهامشي بحيث دفاعكم على الدين يوري قداش هذا الأخير ضعيف ولا علاقة له بإنسان القرن الواحد والعشرين وانما هو مجموعة من الخرافات والأساطير والخزعبلات القابلة للإندثار و المهددة بالإنقراض و قناعاتي الشخصية أن الإسلام بعيد كل البعد عن هذه الترهات بحيث اعتبركم تجار دين ومسيئين لديني وما  انجم نعبر كان على مشاعر التقزز من ناس تدعي امتلاكها تفويض رباني وتوكيل إلاهي بش تحمي الدين.

وفي مسألة ضمان حياد دور العبادة أسف ما انجمش نصدق ناس جعلت من بيوت الله مكان للدعاية الحزبية و الوعود الكاذبة على الشعب وهي مواصلة إلى اليوم في استغلالها.

الفصل الثامن المتعلق بالأسرة يظهرلي تكتب فقط بش يصعبوا الطلاق لا أكثر لا أقل.

الفصل الخامس عشر حول المعاهدات العالمية اعتبره فصل زائف لوجود الكلمة السحرية "فيما لا يتعارض مع أحكام هذا الدستور" يعني أن الدولة التونسية غير ملزمة بأي معاهدة ومواثيق دولية (هنا تفكرت دستور بن علي إلي ديما يزينو "بما لم يخل بالأمن العام" و بالتالي يطيح الفصل كامل في الماء)

أخيرا نحب نعرف وين مذهب بو الفصل المتعلق بالحريات كيما حرية الفكر والصحافة والنشر والإجتماع وتأسيس الجمعيات و الحق النقابي وحق تكوين الأحزاب ؟؟؟؟؟؟

وختاما نقول لهذا الشعب الكريم يعطك ع**ة لشكون صوتت و استغل المناسبة لشكر كل معتوه يساري طلعلنا بفكرة التفصيصي وتحالف مع طيور الظلام في جبهة 14 جانفي و القصبة 1و2 واليوم رافض حتى مجرد المشي في مسيرة مع نداء تونس ضد العنف وقتلي المسيرة ما خرجت كان خاطر تقتل أحد أعضاء الحزب المذكور (الله يرحمه) و سبب رفض اليسار الحمار هو أن هذا الحزب يميني فيه ازلام راس لمبوط أمثال الأزهر العكرمي و الطيب البكوش وسعيد العايدي

اه لا نسيت وقتها العدو كان واحد و وقتها النهضة كانت حركة يسارية تؤمن بالملا لينين و الشيخ ماركس رضي الله عنهما و تدافع عن البروليتاريا المضطهدة و المحرومة

 

بين الشلابق والرداءة السياسية

السلام عليكم ورحمة الله وبركاته، السلام عليكم ورحمة الله وبركاته، السلام عليكم ورحمة الله وبركاته

اخواني اخواتي يوم 2 جانفي سمعت أخبار ما تعجبش وقلت برا نفتتح السنة الميلادية الجديدة بتدوينة بعد طول غياب صار فيه ما صار لكني بش نكتفي ببعض الأحداث.

يوم 31 ديسمبر طلع علينا مستشار الخليفة في رتبة رئيس الجمهورية ليقول أن الإحتفال بالسنة الميلادية موش من عاداتنا وهويتنا العربية الإسلامية، ما كنتش ناوي نعلق على الحكاية لكن سي المنصف خلال زيارته إلى ليبيا صب قطر"ة" فيضت الكاس.

نبداو يا سيدي بالتقويم الميلادي في كلمة بسيطة، يوم 1 جانفي ما عندو حتى علاقة بالديانات وانما هو أول يوم في السنة الشمسية حسب التقويم الغريغوري الذي جاء بعد التقويم الجولياني المعتمد في روما ، ما قلنالكش سيد الرئيس كلمنا على الإحتفال بنوال إلي عندو علاقة بالدين و زد على ذلك الدول العربية تعتمد التقويم الشمسي الغريغوري في معاملاتها اليومية واختم بهذا الفيديو في يوم 31 ديسمبر 2010 حيث تمنالنا سي المنصف المنفي وقتها في فرنسا  أطيب الأماني وقدملنا التهاني بالسنة الجديدة.

وفي كليمتين على الهوية العربية الإسلامية، الطماطم ماهيش من هويتنا و في تونس عرفنا الطماطم في القرن 19 والهندي سلطان الغلة عرفناه في القرن 17, البرنوس إلي لابسو سيد الرئيس كيف كيف بربري ماهوش من هويتنا العربية الإسلامية وأكلتنا الشعبية الكسكسي ماهيش من هويتنا العربية الإسلامية وفي دول الخليج كلمة كسكسي كلمة زايدة !

نواصل في موضوع الهوية و فقط للتذكير، الإنتخابات والصنادق و مكاتب الإقتراع والرئاسة والبرلمان والمجلس التأسيسي ماهيش من قيمنا وهويتنا العربية الإسلامية !

لذا إلي يحب هوية عربية إسلامية ما عليه كان يلتحق بحزب التحرير وإلي يحب على تطور وعلاقات إنسانية كونية ويتعلم من التجارب السابقة للحضارات مختلفة متلاقحة ومتجانسة ما عليه كان يخلي هالنمنامة متع العروبة والعروشية والنزعات العرقية  في كتب التاريخ ..

و بما أن يوم 2 جانفي 2012 يوم الشلابق السياسية والتصريحات الغبية نستعرض على بركة الله ما جاء على لسان سياسيينا  المحنكين (من دق الحنك)

- فيما يخص الوحدة مع ليبيا متع الناتو والتي يحكمها اليوم نظام قبلي لا فيه لا مؤسسات ولا لايلاه، الحق ما لقيت ما نقول على هالفكرة متع سيد الرئيس صاحب الصلاحيات المحدودة و التي من بينها "الحفاظ على إستقلال الوطن والحفاظ على سلامة ترابه ونظامه الجمهوري"، و جاء لبالي خطاب الزعيم الحبيب بورقيبة في البلماريوم إلي ما كنتش نتصور بش نجبدوه مالارشيف و ما تصورتش سياسيي اليوم بش يرجعونا للصراعات فكرية ماتت في القرن الماضي.

- السيد راشد الغنوشي فيلسوف الثورات العربية حسب كلام سي لطفي زيتون (أسوق الخبر باحتراز لأنه صدر في صحيفة المجاري) يمشي لدولة قطر و يقابل القرضاوي صانع للثورات العربية .. الحقيقة التعليق على المسألة هذي يحبلوا جريدة وتفرغ كامل وأنا الحق متع ربي اليوم نسرق في الوقت بالسيف وسأكتفي فقط بالتذكير بأن القرضاوي عرف الغنوشي في هاك الحكاية الإسلامية إلي عاملينها وصل يطالب بالتدخل الأجنبي في سوريا وما يقول حتى كلمة على البحرين إلي دخللهم جيش درع الجزيرة وذبحهم ...

نواصل على بركة الله إستعراض الأخبار المسودة ليوم 2 جانفي

-"تعذّر استئناف الدّروس بكلّية الآداب بمنّوبة" الواحد شنوا ينجم يقول على هالمهزلة الي في الجامعة التونسية إلي وضعها من عند ربي يعيف وتزيد تكمل الجرذان تكور في الحرم الجامعي.

- في الرائد الرسمي للجمهورية التونسية السيد رفيق بوشلاكة وزير الخارجية يدرج إسم الشهرة أي رفيق عبد السلام في أمر يتعلق بتسمية أعضاء الحكومة.

ختاما ما إنجمش نكتب تدوينة بعد غياب طويل دون ذكر السيد المنصف بن سالم إلي تحدث على المرحوم علي الدوعاجي (توفي في ماي 1949) ونسب له حصوله على وسام من بن علي، سي بن سالم إلي أخر بحث علمي قام به يعود إلى سنة 82 أصبح اليوم بفضل حكومة الطبخات السياسية الدسمة عرف هشام جعيط وغيره من الأكاديميين والدكاترة أصحاب الكفاءات في الجامعة التونسية وأمام الأوضاع التعيسة في الجامعة يكتفي سيد الوزير بالعمل 3 ساعات في الوزارة ويلتحق بالمجلس التأسيسي وشخصيا ما تعداتليش حكاية يشد وزير و يحافض على كرسي في التفصيصي ..

ممكن تظهر عندي نظرة تشاؤمية لكن الله غالب مانيش نشوف في مستقبل كيما حلمت بيه، حاجة وحيدة نتمناها هي نجاح هذه الحكومة التي لا تروق لي بالمرة و خليها تنفع البلاد ويطلع كلامي غالط و تتحقق المنفعة الوطنية والسلام عليكم ورحمة الله وبركاته