dimanche 9 octobre 2011

سيدي الشيخ خليني نقول معاك كليمة


غمة حاسس والديها عندي مدة وكل يوم تزيد تتفاقم، جماعة رأيي صواب لا يحتمل الخطأ ونحن نملك الحقيقة المطلقة عيفوني في روحي و عيفوني فالدين (حسب تصورهم للدين موش تصوري الشخصي) .. 

نعرف إلي المواضيع إلي بش نتحدث عليها تستحق برشة حديث لكني بش نحاول نختصر أكثر ما يمكن.

الحديث على الدين ولى حكر على شيوخ الوهابية والمشايخ والملتحين وغيرهم من "أصحاب الحكمة" وأي انسان يجي يبدي رأي يرفضوه جملة وتفصيلا بتعلة ماكش متخصص إلخ إلخ !! يا أخي كان ما نجمش ناخذ موقف ويكون عندي رأي ندافع عليه كيفاش نمنع و نسلكها من واحد يجي يبشر وينشر فالمسيحية ولا المازمبية ولا مذهب دين والديه ؟ ما فماش حل بخلاف النقاش بالتي هي أحسن كيما موجود ومذكور في كل الأديان الموحدة والكتب السماوية.

من بين المسائل إلي ولات عاملتلي قلق يومي مسألة الحجاب والنقاب وقدسية القرأن والهجمة على الإسلام ومالأخر كل المواضيع الدينية إلي طرحتها قناة نسمة.

النقاب برجولية ما نحملوش ويظهرلي تحقير للمرأة و ما نحبش الحجاب لكن مانيش ضد لبس المرأة للحجاب، هي حرة تلبس إلي تحب مادامي خلات وجهها ظاهر بش نتعرف على الشخص إلي قدامي في حافلة ولا كياس ولا مترو، لكني ضد الناس إلي تقول أن المرأة المتحجبة عفيفة وإلي بلاش حجاب إمرأة فاجرة وعاهرة وإلخ ..
سبب رفضي يمكن يكون تاريخي انثروبولوجي وممكن يكون ديني، من الناحية الأولى النساء فاليونان كانوا يلبسوا حاجة شبيهة بالحجاب إلي نعرفوه توا و يغطي الرأس، هذا يعني أن الحجاب كان موجود قبل وجود الديانات اليهودية والمسيحية والإسلامية ثم نلقاو إلى يومنا هذا مسيحيات ويهود يغطيو روسهم لأسباب دينية وهوما احرار.

خلينا نرجعوا لسبب لبس الحجاب، ماو في إطار ستر العورة وما إلى ذلك من كلام تربينا عليه، نتصور أن المرأة زادة كما الرجل عندها أحاسيس وليبيدو، لذا راجل مفتون العضلات ممكن يحرك فيها النزعة الجنسية وممكن راجل شعرو طويل (كيما كانوا الصحابة وكيما كان عيسى عليه السلام) يحركلها مشاعرها لكن مع ذلك عورة الراجل ماهيش صدرو وماهيش شعرو !
من ناحية أخرى في بلدان أفريقية وفي عديد القبائل الراجل كيفو كيف المرأة يلبس جرد شوليقة تغطي الأعضاء التناسلية فقط وفي هذه الحالة الصغير يستانس بالمشهد هذا وكيف يكبر يولي الصدر (عند المرأة والرجل) منطقة من الجسد ما تحرك فيه حتى شعرة! 
 
من الناحية الدينية كيف كيف ماريتش أمر بلبس غطاء رأس أو ما يسمى الحجاب بالمصطلح أو المفهوم الجديد متاعو و هاو بش نفسر علاش !!
كلمة حجاب لم ترد في القرأن بمعنى اللباس أو الزي وانما بمعنى "الساتر أو الحائط وحجب الشىء أى ستره، وامرأة محجوبة أي سترت بساتر" والمرة الوحيدة إلي تذكر فيها على أساس لباس كانت في سورة الأحزاب في الآية 53 و فيها 3 أحكام : 

الأول عن تصرف الصحابة عندما يدعون إلى الطعام عند النبى - ص - والثانى عن وضع حجاب أو ساتر بين زوجات النبى - ص - والصحابة، والثالث عن عدم زواج المسلمين بزوجات النبى - ص - بعد وفاته، وبذلك نفهم من لفظ الحجاب الذى ورد أن القصد منه كان وضع ساتر بين زوجات النبى - ص - وبين الرجال من الصحابة، ويفهم أيضا أن وضع الحجاب أو الساتر خاص بزوجات النبى - ص - ولا يمتد إلى ما ملكت يمينه "من الجوارى" ولا إلى بناته ولا إلى باقى المسلمات، وإلا كانت الآية نصت على ذلك وعممت على كل المؤمنات المسلمات.
الآية 31 من سورة النور والتي تقول: «وقل للمؤمنات يغضضن من أبصارهن ويحفظن فروجهن ولا يبدين زينتهن إلا ما ظهر منها وليضربن بخمرهن على جيوبهن» ما فيهاش أمر بلبس غطاء للرأس لأن الجيب هو فتحة الصدر :)
آية الجلابيب من سورة الأحزاب رقم 59 والتى تقول: «يا أيها النبى قل لأزواجك وبناتك ونساء المؤمنين يدنين عليهن من جلابيبهن ذلك أدنى أن يعرفن فلا يؤذين»، وسبب نزول هذه الآية أن عادة النساء وقت التنزيل كن يكشفن وجوههن مثل الإماء «الجوارى» عند التبرز والتبول فى الخلاء لأنه لم تكن عندهم دورات مياه فى البيوت، وقد كان بعض الفجار - من الرجال - يتلصص النظر على النساء أثناء قضاء حاجتهن، وقد وصل الأمر إلى الرسول - صلى الله عليه وسلم - فنزلت هذه الآية لتصنع فارقا وتمييزا بين الحرائر والإماء «الجوارى» من المؤمنات حتى لا تتأذى الحرة العفيفة، وكان عمر بن الخطاب إذا رأى أمة «جارية» قد تقنعت أى تغطت أو دانت جلبابها عليها ضربها بالدرة محافظا على زى الحرائر «أخرجه ابن تيمية - حجاب المرأة ولباسها فى الصلاة - تحقيق محمد ناصر الدين الألبانى - المكتب الإسلامى - ص 37».
اش بقى ؟؟ حديث منسوب للرسول - ص - رواه أبو داوود (4104) عن الْوَلِيدُ عَنْ سَعِيدِ بْنِ بَشِيرٍ عَنْ قَتَادَةَ عَنْ خَالِد بْنِ دُرَيْكٍ عَنْ عَائِشَةَ رَضِيَ اللَّهُ عَنْهَا أَنَّ أَسْمَاءَ بِنْتَ أَبِي بَكْرٍ دَخَلَتْ عَلَى رَسُولِ اللَّهِ صَلَّى اللَّهُ عَلَيْهِ وَسَلَّمَ وَعَلَيْهَا ثِيَابٌ رِقَاقٌ فَأَعْرَضَ عَنْهَا رَسُولُ اللَّهِ صَلَّى اللَّهُ عَلَيْهِ وَسَلَّمَ وَقَالَ : ( يَا أَسْمَاءُ إِنَّ الْمَرْأَةَ إِذَا بَلَغَتْ الْمَحِيضَ لَمْ تَصْلُحْ أَنْ يُرَى مِنْهَا إِلا هَذَا وَهَذَا ) - وَأَشَارَ إِلَى وَجْهِهِ وَكَفَّيْهِ –
هذا الحديث من أحاديث الآحاد لا الأحاديث المتواترة الصحيحة السند غير المنقطعة المجمع عليها، (بعبارة أوضح سي خَالِد بْنِ دُرَيْكٍ لم يعاصر عائشة يعني السند هوني ضعيف) لكنه حديث الآحاد غير مقطوع بسنده فلا يكون إلا للاسترشاد والاستئناس، لكنها لا تنشئ ولا تلغى حكما شرعيا !

لذا فكوا على والدينا وإلي تحب تلبس حجاب تلبس وتشيخ روحها ما غير ما تجي تمرج أختي و مرتي لا نولي نطالب يتنحى الحجاب خاطر وكما بينت ماهوش واجب لا فالقرأن ولا فالسنة حسب رايي و إلي عندو آيات أخرى يتفضل يجيبهم !!
جماعة النقاب ماغير ما نكسر راسي نتصور كل شيء واضح لكن الفرق بينها وبين المتحجبة أن حقها فالنقاب هو كيما حقي أني نلبس كاغول ونحوس معاها فالشارع !
أخيرا وليس أخرا نسمع في ناس تقول أن القرأن مقدس وعافسين في يوسف الصديق وقناة نسمة ! يا ديني القداسة هاذي عمرو ما القرآن وصف بيها نفسو ! من المقدسات فما كان ربي مقدس (من أسمائه القدوس) والباقي الكل مصطلحات دخيلة جات بعد قرون من الإسلام وإلي يلقى آية فالقرآن تقول راهو مقدس يجيبهالي .
زد على ذلك كان ربي مقدس و نردو القرآن مقدس والنبي مقدس (معصوم كما يقولوا برشة ناس) فإن هذا يستدعي منا التثليث "La Trinité" كيما المسيح !!
في ما يخص فيلم برسيبوليس نحب نقول كليمة بسيطة، لازم النفاق ونعملوا فيها شاطح باطح ؟؟ يا ديني الصغار الكل عندهم تصور للإله وكل واحد منا عندو تصور وتجسيد للإله في مخو لكن هل يعني هذا راهو ما عرضه الفيلم هو الله ؟؟

في ما يخص الهجمة على الإسلام إلي نسمع بيها منذ سنين ، بجاه ربي ويني الهجمة ؟ سمعتوا واحد يربرب فالتلفزة ؟ سمعتوا واحد قال ما عادش ندرسوا التربية الإسلامية فالمدارس والمعاهد ؟؟ كل ما يحكى وما يقال حاجات مسكوت عنها ونحبوا نغطيوها وحكى عليها ابن رشد ،ابن باجة، ابن زهر، ابن طفيل، الفارابي، ابن سينا ، ابن خلدون ...المعتزلة (إلي الظلاميين محاوولهم أغلب كتبهم ومنشوراتهم) !! محمد الطالبي كمفكر عرض حقائق تاريخية لا لبس فيها صبح الراجل مهدد ومنسوبلوا كلام ما قالوش و انما قالوه ومازالوا يقولوا فيه مجموعة كبيرة من الشيعة. يا ديني شوية وسع افق وشوية تواضع وإبتعاد عن الإستبداد بالرأي و الدوغمائية يوصلونا للنتيجة وينحي علينا فزاعة الخوف من مواجهة الأخر.
والناس إلي ماشي في بالها هي صحيحة وباقي الناس على ضلالة نقلهم راهو ربي تجنب إكراه الناس على الإيمان (ولو شاء لفعل) ونهى رسوله أن يعمد إلى الإكراه و ادعوهم لقراءة القرأن لفهمه موش بحثا عن الأجر فقط و هاذي بعض الأيات تؤكد ما قلته : القصص 26 الآية 56 ؛ يونس 10 الآية 99 ؛ المائد 5 الآية 105 ؛ يونس 10 الآية 108; الزمر 39 الآية 41 .
  
 أخيرا إلي بش يجي يسب ويعفس توا نقلوا خويا جيبلي تصوراتك الخاصة لكل ما ذكرت وحاول تقنعني بالتي هي أحسن عملا بقوله "ادْعُ إِلَى سَبِيلِ رَبِّكَ بِالْحِكْمَةِ وَالْمَوْعِظَةِ الْحَسَنَةِ وَجَادِلْهُمْ بِالَّتِي هِيَ أَحْسَنُ إِنَّ رَبَّكَ هُوَ أَعْلَمُ بِمَنْ ضَلَّ عَنْ سَبِيلِهِ وَهُوَ أَعْلَمُ بِالْمُهْتَدِينَ" مع العلم أن لا أحد يملك الحقيقة المطلقة ورأيي صواب يحتمل الخطأ وخطأ يحتمل الصواب :)

mardi 26 juillet 2011

ما تحبش تقيد ؟ أقعد


ما تحبش تقيد ؟ أقعد ... خلي يرجعولنا الجماعة ياكلولنا وجوهنا ونعملوا بن علي جديد
ما تحبش تقيد ؟ أقعد ... خلي نعاودوا معبوكة التصفيق من جديد
ما تحبش تقيد ؟ أقعد ... خلي نعاودوا نسكرو أفامنا من جديد
ما تحبش تقيد ؟ أقعد ... خلي يرجع التعذيب
ما تحبش تقيد ؟ أقعد ... خلي الجماعة يشمتوا فينا
ما تحبش تقيد ؟ أقعد ... خلي نرجعوا لتقييد الأحوال و وين مشينا ووين جينا
ما تحبش تقيد ؟ أقعد ... خلي نرجعوا نعسوا على رواحنا فالقهوة شنقولوا و فالدار شنقولوا
ما تحبش تقيد ؟ أقعد ... خلي يعاودوا يسرقونا ويجوعونا
ما تحبش تقيد ؟ أقعد ... خلي يعاودوا يعفسونا ويمرمدونا
ما تحبش تقيد ؟ أقعد ... خلي ترجع تخاف تقول كلمة الحق

خليك هاك قاعد شقام عليك تضيع دقيقتين بالحساب للتقييد

أنا قيدت
خاطر نحب نعيش أول تجربة ديمقراطية في تاريخ البلاد و يعيشوا صغاري متهنين موش رعايا بل مواطنين
أنا قيدت 
خاطر الشهداء ماتوا بش يتنحى بن علي ونعيشو بكرامتنا، موش حرام كان يضيع دمهم خسارة وما يتبدل شيء ؟ 
أنا قيدت  
خاطر الوضع الحالي ما يعجبش وبش نخرجوا من أزمة اللاشرعية لازم تنجح الإنتخابات
أنا قيدت  
خاطر نحب نمارس المواطنة متاعي ونتنفس الحرية

تحب تعيش راسك عالي ؟ برا قيد !

  ملاحظة صغيرة ، ما تعرفش لشكون بش تصوت ؟ حتى أنا كيفك أما نعرف لشكون ما نصوتش ومن هنا للأكتوبر تتوضح الرؤيا ونولي نعرف لشكون نصوت لذا نقيد توا بش ما نندمش مبعد و نقول يا ليتني ...            

samedi 16 juillet 2011

اليوم هو غدوة إنت و أنا



كنت فسرت في التدوينة هاذي علاش أنا ضد إعتصام القصبة 3  .. لكن اليوم ريت معاملات ما تعجبش وتفكرنا بالممارسات القديمة.
مانيش بش نقوم نحكي على تسييس الجوامع واستعمالهم للأغراض التعبئة للاعتصامات و غير ذلك لكن بش نحكي عالعنف إلي صار .
الغاز والقنابل المسيلة للدموع ماهي ما شاء الله ولات عادة عندنا والمواطن التونسي يحشش عليهم وحرام عليكم حرمتوه توا قريب شهرين بعد ما سنستوه والله عيب وعيب كبير
موش لازم نحكي على حرمة الجسد إلي يبولوا عليها في دول بني عربان في حين الغرب الكافر يحترمها، موش لازم نحكي على احترام الأماكن المقدسة زادة.. اه لا لازم ، في تونس السائحة الأجنبية كيف تجي تزور جامع الزيتونة وإلا عقبة بالقيروان تلبس فوطة بش تحترم المكان إلي هي فيه واحنا في بلد بني عربان ندخلوا للجامع نبمبرديوه بالغاز وكان لزم الكرطوش وسط كلام هايل من قبيل ذكر الله بالتربريب
مانيش بش نلوم علي خرج الناس مالجامع متناسيا أن "الأمن الوطني" لا عندو لا قلب ولا فريوة ومانيش بش نحكي عالبوليس إلي ما يحشمش على روحو لكن بش نلوم على الثقفوت إلي مشاو يتشكاو لفرنسا من حادثة "الإفريك-ار" والناس إلي بقات تندد بالعنف متع الخوانجية والناس إلي تشمتت في توانسة كيفهم كلاو طريحة.
عقلية البوليس فاسدة وماهيش بش تتبدل كان ما ناقفوش الكل يد وحدة، اليوم هوما كلاو طريحة غدوة أنا و إنت ناكلوها والناس تبقى تتفرج فينا

Quand ils sont venus chercher les communistes,
Je n'ai rien dit,
Je n'étais pas communiste.
Quand ils sont venus chercher les syndicalistes,
Je n'ai rien dit,
Je n'étais pas syndicaliste.
Quand ils sont venus chercher les juifs,
Je n'ai pas protesté,
Je n'étais pas juif.
Quand ils sont venus chercher les catholiques,
Je n'ai pas protesté,
Je n'étais pas catholique.
Puis ils sont venus me chercher,
Et il ne restait personne pour protester
[Martin Niemöller]


وكليمة للجماعة إلي دزوهم للإعتصام ، أهوكا إلي دزكم مبعد تبرا منكم وقال خاطينا كيف فشلتوا، لذا اعرفوا فاش تعملوا كيف تدافعوا عليهم وتعبدوا فيهم

vendredi 15 juillet 2011

إعتصام إعتصام حتى يوفى الإعتصام

ملاحظة بسيطة للثورجية : أنا مالأغلبية الصامتة و مندس ماسوني رغم أن كسيبتي حق قهوة و باكو دخان متع غدوة

بعد 14 جانفي صار إعتصام القصبة 1 إلي صلح برشة حاجات وحسن الأوضاع ، بعدها جاء إعتصام القصبة الثاني (بدفع من الحزب الشيوعي و النهضة) إلي ترفعت فيه شعارات ومطالب كنت موافق عليها بنسبة 80% لهذا ساندت هالإعتصام، لكن ما يخفاش عليكم أنهم "غلطوني" كيف قالولي نعملوا مجلس تأسيسي، كان ماشي في بالي بش يجيو ناس يفهموا فالقانون الدستوري ويعملولنا دستور جديد ومش الأحزاب هي إلي بش تكتبوا، ومانيش فاهم كيفاش واحد ينتمي الحزب معين وهو طبيب و إلا مهندس ويقوم يكتب دستور البلاد .. على كل مش لازم نطولوا الحديث خاطر وحلت الفاس فالراس

 هالأيامات فما مشروع إعتصام القصبة 3 (وإلي واضح وما يخفاش على حد أن الإعتصام بدفع من هاك الجماعة ولا يخدم سوى مصلحتهم) ومطالبه
1- إعادة هيكلة الهيئة العليا لتحقيق أهداف الثورة , بتنحية بن عاشور و المطبّعين من الكيان الصهوني و ضرورة تشريك شباب الثورة من كل الأطياف لتحقيق التوازن فيها
2- إقالة كل من وزير الداخلية و وزير العدل
3- استقلالية القضاء
4- محاسبة قتلة الشهداء و رموز الفساد
5- تفعيل العفو التشريعي العام
6- التّمسك بموعد 23 أكتوبر للإنتخابات مع ضمان أن تكونة شفافة و نزيهة و بدون التسجيل, فقط ببطاقة التعريف
7- تجريم التطبيع مع الكيان الصهيوني الإسرائيلي
8- سحب تراخيص الأحزاب التّجمعية
9- إلـــغـــــاء المديونية
10- لا لوصاية أجنبية على البلاد التونسية
باهي موش بش نقول إلي البلاد ولات سويسرا وإلا السويد لكن الإعتصام مطالبه شعبوية ياسر ولا عقلانية أحيانا وما بوسعي سوى رفضه للأسباب التالية

1 - الهيئة العليا لتحقيق أهداف الثورة هي محل توافق وإجماع من أغلب الأحزاب والشخصيات المستقلة إلي فيها وفما حزب العمال الشيوعي رفض يدخل وكان واضح وصريح مالنهار الأول وما لعبش لعبة يمشي و يجي و يجي ويمشي كيما الناس الأخرين..
2 - إقالة وزير الداخلية و العدل وإلا عشرة ماهيش بش تغير حاجة كبيرة لأن الفساد متفشي في هذا الجهاز و في الإدارة التونسية وما على الناس إلي تخدم فالقطاعات هاذي سوى تنظيف ادارتها
3 - قضاء مستقل ما يستدعيش إعتصام خاطر موش بش نعديو شهر معتصمين وبعد يخرجلنا الباجي يقول جوكم باهي هانا نظفنا القضاء ! المسألة لا تعني الحكومة وما على أهل القطاع هذا سوى تصليح اوضاعهم
4 - محاسبة القتلة ( الله لا تباركلهم) مسألة مهمة و واجبة لكن ماهيش بالسهولة إلي يتخيلها البعض وعلى سبيل المثال بش تجيب الكرتوشة إلي ضربها فلان بش قتل الشهيد فلان أو فلتان ماهيش حاجة ساهلة، وفيما يخص رموز الفساد هام جايين فالثنية وبدات محاكمة البعض والبعض مازال وكيما يقول المثل "يا قاتل الروح وين تروح " ما عندهم وين هاربين بإذن الله
5 - العفو التشريعي العام عملوه وتسيبت الناس مالحبوسات وكان فما شكون ما استردش حقوقو كاملة ما عليه كان الصبر لأن المشكل في الإدارة أكثر منه مشكل الحكومة
6 -  التمسك بتاريخ 23 أكتوبر ما يخصش الهيئة متع بن عاشور وإلا كمال الجندوبي فقط وانما يخص الناس الكل وعلى راسهم الأحزاب إلي لازمها ما تحطش العصا فالعجلة وتلعب كيف الراقصة رايحة جاية جاية رايحة وانما تناقش مواضيع هامة تخص الشعب والمواطن البسيط إلي موش لاقي باش يستر روحو و إلي الهوية عربية كانت أو غانية ما توكلوش الخبز 
7 - حكاية التطبيع مع إسرائيل هذي حكاية فارغة عملوها جماعة انتهازيين و ما عندها وين توصل و نسبة كبيرة من التوانسة بما فيهم أغلبية من اليهود رافضين التطبيع مع إسرائيل
8 - فما ناس بش تصدر فيهم ليستا وما عندهمش الحق يترشحوا للإنتخابات القادمة ولمدة 10 سنين لذا فإن التجوع الديمقراطي مشى على روحو و ما تنجمش تمنع مواطن كان ينتمي للحزب هذا أن ينتمي اليوم لحزب أخر في صورة جديدة للتجمع وما عليك سوى عدم التصويت للجماعة هاذم وكان ربحوا صحة ليهم ونكونو برهنا أننا شعب بهيم بالوذنين وسبحان من حرم علينا الحشيش وما علينا كان قبول النتيجة
9 - المديونية حكاية مخطرة لكن ما فماش مفر منها لكن حسب رأيي ماناش في وضع مزري كيما يتصور البعض وما علينا سوى المطالبة بالشفافية من قبل الحكومة ووقتها يعمل ربي دليل على ردت الفعل كيفاش بش تكون
10 - الوصاية تصلح بالناس العاجزة ومش بالشعب التونسي لكن على ما نرى فما ناس مغرومين بشكر نور أو صوت الله على الأرض أو التنويه بديمقراطية دولة بني صهيون وقبول دعوات من أجهزة الولايات المتخذة الأمريكية ...

 المطالب حسيتها شعبوية ياسر وبش تخسرنا في سلاح مهم هو الإعتصام و أحنا صبرنا صبرنا نكملو نصبروا من هنا للإنتخابات ووقتها نطالبوا الحكومة الجديدة بش تحقق ما نطمح إليه وتكون الناس نقصت من الدمغجة  وبعد هالكليمتين بش نكون اليوم 15 جويلية راكش فالبحر نلعب طريح بيتش ونعمللها تكويرة وإلي يحب يعتصم يتفضل من حقو وربي يوجهو خير.
 
   

vendredi 24 juin 2011

ما نحبش ننهض والناس هاذم تمثلني


 

في بلادي العزيزة إلي قامت فيها ثورة ناوية تقطع مع النظام البائد الفاسد و... إلخ . نلقى ناس ناوية تعيش في القرن الأول للهجرة و تقطع العلاقة مع الغرب رغم أن الغرب ماهوش باهي للدرجة يولي ملايكة و ماهوش خايب لدرجة يولي شيطان.

راسي تكسر من هالأفكار التي اعتبرها قديمة ياسر و بش ما نطولش نعطي مثال بسيط حسب تجربتي المتواضعة، إذا كان ناوي تقطع العلاقة مع الغرب فإن البلاد بش تعيش فالظلام لسبب بسيط جدااااء ألا وهو أن أغلب المعدات الموجودة عند الستاغ مشرية من عند الغرب، أبداها مالكابل الهنداوي متع الضوء للجهد العالي مرورا بمعدات الإتصال الأمريكية الموجودة في قاعة توزيع الكهرباء وأنت ماشي
لذا نهارت إلي تولي بلادنا تصنع هالمعدات الكل نولي نحكي على قطع علاقات مع الغرب و ما غير ما نجبد المعدات الثقيلة و نحكي على التوربينات إلي تصنع فالضوء .
ما نحبش نزيد نكعرر برشة ونبقى ننقد فالفكر الذي اختلف معه لكن بش ننقد الأفعال أو بالأحرى العمايل !
أيا سيدي خليني نحط الأمور في اطارها، عندنا حزب يحب على دولة الخلافة و قلك إذا كان نربحو رانا بش إنحيو الديمقراطية، الناس هاذم على قد ما نكره فكرهم على قد ما نقدر صدقهم فالقول وانشاء الله ما يمروش للعمل لأن العمل متاعهم رهيب وبش يطيح برشة بنيات فالبلاد ويقضي على عديد الأرواح متع التوانسة إي نعم توانسة موش قورة جايين من بلاد أخرى.
لذا يا شعبي العزيز إلي ناوي منكم على القرن الأول للهجرة يتفضل أهوكا عندو حزب التحرير وإلي ما يساعدوش يتفضل أهوكا عندو برشة احزاب .
وعندنا في ربوع الخضراء ناس اخرين بدلوا فكرهم وولاو ديمقراطيين وحداثيين حسب ما يقولوا :)
أيا سيدي نبداو على بركة الله، الناس هاذم يقولوا أن كل واحد عندو الحق يعتنق الدين إلي يحبوا .. الناس هاذم يقولوا أن من حق السوكارجي يسكر.. الناس هاذم يقولوا أن الماخور موش بش نسكروه وفيه نساء يمارسوا في مهنة تعتبر من أقدم المهن في التاريخ الإنساني و موش حكر على تاريخ المسيح أو اليهود .. الناس هاذم لباو إستدعاء الولايات المتخذة الأمريكية وقابلو السيناتير ماك كاين المعروف بحبه لإسرائيل ونعته للثورات العربية بالفيروس ..
لذا الوخيان إلي يحبوا الشعب الكل مسلم و يحبوا يسكروا الحانات والماخور و يكرهوا أمريكا و إسرائيل ويتشرفوا بهويتهم العربية، يتفضلوا يخدموا عقلهم ويفهموا إلي الناس هاذم ما يعبروش عن آراءهم.
الناس هاذم كيف تبدل رئيس الحكومة المؤقت (الله غالب يا سي الباجي لازمني نسمي الأشياء بمسمياتها ونذكر إلي سيادتك مؤقت ههههه) وبعد التخلي عن مجلس حماية الثورة وتأسيس الهيئة العليا إلي اسمها طويل، الناس هاذم دخلوا فالهيئة.. و بعد النقاشات والعرك تجبدت حكاية العقد الجمهوري و الناس هاذم ما وافقوش على الوثيقة وعلقوا العضوية متاعهم فالهيئة وبعد مدة عاودوا رجعوا ...
الناس هاذم كيف تجبد موضوع قانون الأحزاب والنظر فالتمويلات ولاو فادين مالموضوع و يحبوا يحكيو عالعقد الجمهوري و كيف البقية كبشو ولاو هزوا رواحهم مالهيئة وقالوا ما عندهاش شرعية (و قيل حسب رايهم العادم الهيئة ما يولي عندها شرعية كان بحضورهم) !
لذا الوخيان إلي يكرهوا الكذب و النفاق ويؤمنون بقوله تعالى "إن الله لا يهدي من هو مسرف كذاب" [ سورة غافر: 28] ، يتفضلوا يخدموا عقلهم ويفهموا إلي الناس هاذم ما يعبروش عن آراءهم (اللهم كان هوما زادة منافقين) .
ونتصور مفهوم الكذب والنفاق مفهومين وما يستحقوش توضيح ولو ما عادش نستغرب شيء من الثورجية الأبرار
أخيرا الوخيان إلي يحبوا هالناس هاذم وبخلاف فكرة البنوك الإسلامية وثقافة التكبير ووصف واحد منهم بحبيب الله والعياذ بالله و بعد الإطلاع على التدوينة هاذي للصديق استراث ، يتفضلوا يعطيوني برنامج إقتصادي وثقافي للناس هاذم.
نكمل حديثي وحديثنا قياس بمقولة للدكتور والمفكر التونسي هشام جعيط "إذا كانت هذه النهضة فكيف يكون السقوط"

dimanche 27 février 2011

J'accuse


*Cette lettre est inspiré de la célèbre lettre à M. Félix Faure, Président de la République française lors de l'affaire Dreyfus, parue dans l'Aurore du 13 janvier 1898 sous la forme d'une lettre ouverte.

LETTRE

A madame Bhema

Reine de certaines âmes

Madame Bhema

Me permettez-vous, d'avoir le souci de votre juste gloire et de vous dire que votre étoile, si heureuse jusqu'ici, est menacée de la plus honteuse, de la plus ineffaçable des taches ?

Vous êtes sortie saine et sauve des basses calomnies, vous avez conquis les cervelles. Vous apparaissez rayonnante dans les têtes d'une majorité de nouveaux révolutionnaires , et vous vous préparez à régner au solennel triomphe de notre chère révolution.

Mais quelle tache de boue sur votre nom -- j'allais dire sur votre règne -- que cette abominable affaire de vol des cervelles.

Les tunisiens vivent divisés maintenant, l'histoire écrira que c'est sous votre règne qu'un tel crime social a pu être commis.

Sur les réseaux sociaux vous êtes toujours présente votre excellence madame Bhema !
Des milliers de jeunes tunisiens traitent des milliers d'autres jeunes tunisiens comme eux d'être des Rcdistes juste parce qu'ils ne sont pas de leurs avis , des milliers de vos admirateurs laissent notre révolution et se contentent de parler de franc-maçonnerie, des milliers de jeunes tunisiens n'arrivent plus à accepter la différence, des milliers de jeunes tunisiens sont aujourd'hui incapables de comprendre les concepts, des milliers de jeunes tunisiens se croient tous révolutionnaires et oublient qu'ils applaudissaient votre intelligent élève du nom de Zaba, des milliers de jeunes tunisiens deviennent des connards qui propagent les intox pour détruire notre révolution sous votre règne !

Cette révolution, cette justice, que nous avons si passionnément voulues, je ne vous laisserai pas nous la voler !

Mais cette lettre est longue, votre excellence madame Bhema, et il est temps de conclure.

J'accuse Zaba le sale déchu d'être votre complice pour vous garantir votre règne.

J'accuse nos médias incompétents de nuire à la santé de plusieurs intelligents cultivés en diffusant les émissions à la con.

J'accuse plusieurs enseignants incompétents de rendre plusieurs jeunes, des dogmatiques qui n'arrivent plus à accepter les critiques.

J'accuse l’imbécillité de rendre plusieurs jeunes tunisiens incapables de raisonner, de comprendre et d’agir judicieusement.

J'accuse l'absurdité de rendre nos jeunes ineptes en leur confisquant la logique.

J'accuse la sottise d'être aussi votre complice qui se propage dans la société civile.

J'accuse la bêtise d'être votre complice qui nous empêche de parler en tant que citoyen libre qui connaissent leurs limites .

J'accuse enfin tous ceux que j'ai oublié de citer et qui étaient votre complice.

Quant aux gens que j'accuse, j'ai contre eux rancune et haine. Ils sont pour moi des esprits de malfaisance sociale. Et l'acte que j'accomplis ici n'est qu'un moyen révolutionnaire pour hâter l'explosion de la vérité et de la justice.

Je n'ai qu'une passion, celle de la lumière, au nom de ma Tunisie qui a tant souffert et qui a droit au bonheur. Ma protestation enflammée n'est que le cri de mon âme. Qu'on ose donc me traduire en cour d'assises et que l'enquête ait lieu au grand jour !
J'attends.
Veuillez agréer, votre excellence madame Bhema, l'assurance de mon profond respect.

samedi 26 février 2011

Entre le régime de Zaba et la connerie

On en a marre du régime de Zaba !! on en a marre des connerie !!
I- Finir avec le régime de Zaba
Lors d'une révolution il faut finir avec l'ancien régime, il faut dissoudre le parti-état et changer la constitution de honte qui était faite par le dictateur sur mesure...
1 - Pour réaliser ceci il faut élire une assemblée constituante :
Je crois que le changement de notre constitution est chose primordiale puisque nous savons tous que "ben ali" l’a défiguré pour son compte. Donc une assemblée constituante doit être élue à fin de nous offrir une nouvelle constitution qui nous garantit notre liberté et une vraie démocratie.

2 - Je veux comme tout tunisiens la dissolution du parti pourri du nom de RCD (Le ministre de l'Intérieur a présenté, lundi 21 Février 2011, au Tribunal de première instance de Tunis, une demande pour la dissolution du parti pourrit).

3 - Puisque la chambre des députés et la chambre des conseillers sont pour la majorité des "rcdistes" et que même la plupart des opposants présents dans ces chambres sont aussi des pourris, il faut donc les dissoudre immédiatement.
Comment faire ? Je crois que c'est faisable en lisant cet article

مشروع أمر لتنظيم السلط العمومية في الوضع الانتقالي / الصباح

Ces 3 points figurent déjà sur la liste des demandes du conseil national de la protection de la révolution !

D'accord je suis avec vous pour ces demandes que je qualifie de légitimes MAIS en lisant votre premier principe [1/Le Conseil National pour la Protection de la Révolution doit avoir un pouvoir décisionnel et veiller à l’élaboration des législations relatives à la période transitoire et à leur adoption (abrogation des lois contraires aux libertés)], je vous dis non merci !
Je ne peux vous donner la possibilité de gouverner et de parler en mon nom !
Avec ce pouvoir décisionnel vous pouvez appliquer une nouvelle dictature et on aura un gouvernement merdique dans un autre gouvernement honteux ! Vous prétendez parler au nom du peuple ? N'oubliez pas qu'on ne connait pas les partis politiques adhérents dans ce conseil et personnellement je ne vous aime pas...
4 - Concernant le régime parlementaire, je crois que le problème n’est pas au niveau du régime qu’il soit parlementaire ou présidentiel. En Italie on a un régime parlementaire instable où le gouvernement est dissout et remplacé souvent mais en Grande-Bretagne le régime parlementaire fonctionne bien.
C’est vrai qu’en lisant la liste des 30 pays les plus démocratique on trouve que la majorité d’entre eux ne sont pas les pays ayant le régime présidentiel mais ceci n’empêche que ce dernier peut être un garant de la démocratie et il n’est pas toujours mauvais.
Pour notre Tunisie je crois qu’un régime parlementaire nous mènera à un régime islamiste. Pourquoi ?
C’est simple : Nous avons 45 partis (certains ont déposé des demandes et attendent encore leurs visa) jusqu’à cet instant dont 2 partis islamiste (modéré ou pas je m’en fous, je n’ai pas confiance en eux et je crois qu’ils ont reporté leur jihad à une date ultérieure, et vous pouvez voir comment R.Ghanouchi a remercié à la fin de 2010 le gendre de ZABA puis il a changé de discours après le 14 janvier et comment le 22 janvier 2011 il a remercié le fils assassin de Kadafi ).
Les partis sont des dizaines, dispersés et divisés et on a un seul parti de droite bien organisée, donc si on aura de vraies élections transparentes nous serons gouvernés par un chef de gouvernement de ce parti…
Les premières années tout sera bien mené mais petit à petit les salafistes vont vous pourrir la vie….
II - Certains ne sont jamais seuls, ils sont toujours accompagnés de leur connerie. [Arletty]
1 - Ces derniers jours on parle de franc-maçonnerie dans chaque coin de la rue, chaque café, chaque faculté, chaque profil sur facebook… Mais bon Dieu finissons en avec ces conneries !!! Arrêtez cette stupidité de traiter chaque personne qui se frotte le torse d’être un franc-maçon ! Et encore pire, en discutant sur facebook à propos du sit-in de la Kasba, un sale con m’a traité de franc-maçonnerie juste parce que je m’adressais à lui en français :) alors j’ai failli changer de langue en lui parlant en arabe littéraire pour qu’il me traite d’être un agent au profit des tunisiens et des arabes ;)

2 – Les cons sont encore là en Tunisie et il faut les stopper, une fille qui veut créer un scandale entre Slim Amamou et son ami Yassine Ayari en affichant sur son blog des informations dont 90% sont fausses (et c’est Yassine qui me le confirme). Encore les commentaires que certains ont écrit montrent une bassesse et une stupidité inégalables.
Mais bons Dieu vous n'avez rien à foutre ? Vous ne savez que propager la zizanie ? Vous ne savez qu'accuser les gens ? Avec ces actes à la con vous vous sentez heureux et soulagés ? Je vous emmerde !
D’autres cons accusent Lina Ben Mhenni (accompagnée de représentants de la société civile) d’avoir parlé au nom du peuple au 1er ministre en lui disant qu’elle veut une assemblée constituante alors que dès le début elle a dit qu’elle ne parlait pas au nom du peuple ! Puis d’autres connards démentent ce qu’elle dit à propos de l’agression de sa copine Hana Trabelsi (le 25.02.2011) par la police politique au point de pousser la jeune agressée à écrire un commentaire et à se justifier (comme si la pauvre était obligée) , cette jeune j’espère qu’elle va bien et que Dieu la protège. Par leur stupidité ces cons ont obligé Lina à partager le contenu d’un message privé entre elle et sa copine…. La confirmation de l'agression est aujourd'hui mentionnée sur tunisie-expression..Shame on you sales cons douteux.
Je ne connais pas Lina personnellement mais j’ai toujours apprécié ce qu’elle a fait au moment où beaucoup n’osaient même pas respirer...
Finalement je vais dire que ma vision de l’avenir est floue mais n’oublions pas que ceux qui ont pu sortir Zaba sont capables de construire une nouvelle Tunisie avec un régime démocratique non théocratique .

mercredi 23 février 2011

في توضيح بعض المفاهيم

- الماسونية من ماسينيسا أو ماسينيسان وتعني مس أو شد النيسان وهي فكرة يابانية عملها كارل ماركس خلال الثورة الفرنسية وأسس بها تصور جديد وهو الامبيريلشيوعيزم.


- الامبيريلشيوعيزم من إمبريالية وشيوعية. الامبيريالية من إمبريفو فالفرنسية وتعني ظهور خطر لم يكن فالحسبان، وشيوعية من شاع أي كثر فالبلاد؛ بالتالي فإن هذا المفهوم الذي وضعه الصهيوني ماركس هو مفهوم يأكد أن خطرا يحدق بالبلاد ويهدد حرية الشعب.


- الحرية من حار حيرة وحيرورة أي بهم وما لقى مايعمل دورها يدبر على الناس شيعملو ويا تبعني يا ضدي وبش نكور بيك. ويذهب العلماء إلى اعتبار المشتق من حرية هو حارة أي 4 أشيات سيدي خويا.


- العلمانية من علم الشيء أي يفهملها، بعد الباك نسميوه عليم وبعد الماستير علامة وبعد الدكتوراه يصبح علماني وهذا المفهوم يتوضح عندما نحلل المرادف له وهو اللائكية من لاك يلوك لوكاً ولكلكتاً أي أغلق المساجد ومنع الناس من القيام بالفرائض الدينية و طبق المفاهيم القروسطية أي فالفترة الفاصلة بين الحرب العالمية الأولى والفترة التي تلتها أي بعد اكتشاف ألة الطباعة خلال القرن الموالي و هذه الألة صنعها الصهيوني الماسوني الشيوعي والإمبريالي غوتنبرغ المولود في مدينة غوتة اوند جبن الإسرائيلية .

فبالتالي يتوضح أن الصهيونية وهي أم الماسونية باستعمال العلمانية والأليات الاخرى كألت الطباعة تهدد البلاد بعد الثورة.


- الثورة من ثار يثور أي قلب الفيستة ورفع صوته عالياً وفي بلادنا قامت ثورة في 14 جانفي بقيادة الإسلاميين.

- الإسلامي هو كل مسلم أسلم وجهه لله وطبق الديمقراطية ورفض الخلافة ولم يتدخل في فرض عقيدته على الناس.


- المتمعن في العدد 14 يلاحظ هل 4 اشيات ألي أشرتلها سالفاً :

* العدد 14 هو أربعة موضوعة على يسار رقم واحد ورقم واحد هو رقم شكري الواعر

*14 هو رقم سراج الدين الشيحي .

*14=7*2 ... رقم ثنين هو رقم خالد بدرة ورقم سبعة هو رقم تميم الحزامي.

* 7+2 =9 كيف نضيفها لجانفي ألي هو الشهر الأول تولي 9+1=10 وهذا رقم الدراجي

عاجل وخطير فيقوا!!!! اللاعبين لكل لعبوا و لا يلعبوا فالترجي الرياضي التونسي !!!!


- الترجي من رجا يرجو أي تنازل عن الألقاب وخلى من هب ودب يركب عالأحادث

ولهنا لومور تتوضح ويصبح عندنا إجابة على سؤال : ثورة 14 جانفي من يقف ورائها وماهي اهدافها؟ ويكون الجواب : الترجي قام بالثورة بقيادة الإسلاميين.

وفالأخير نجم نقول أن الإسلامين هم الأحق بالحديث عن الثورة هالأيمات باعتبارهم أول من رفض نظام زينوشي .


كانت هذي قراءة وتفسير للشيخ لحيوت بن بهموت لإنارة العقول بعد ماكثر تواجد المفاهيم الخاطئة عند برشة ناس و هالتفسير موجود في عديد صفحات الإنترنيت و خاصةً على الفايسبوك وبزيارة هذا الموقع تنجموا تلقاو عديد المفاهيم مطروحة بشكل اوضح.


*ملاحظة بسيطة: المفاهيم لكلها من وحي الخيال وكل من تخول له نفسه بش يتبنى فكرة نقلوا يا بهيم شايم أون يو عملت العار !

dimanche 20 février 2011

يزينا ما عانينا


السلام عليكم يا شعبي المشتت. اليوم ولينا مشتتين و خايفين وبعدنا على بعضنا ونسينا ثورتنا، ثورة الكرامة، نسينا شهدائنا الي خلاولنا وصية الا وهي تأسيس دولة ديمقراطية تلمنا الناس الكل.

مانيش بش نطول ونعمل تحليل سياسي خاطرني لحقيقة مانفهمش فالبوليتك ومانيش مالناس إلي تدعي الفهم وتبدى تحلل في تحاليل يندى لها الجبين وللأسف فما شكون تجد عليه ويصدقها.

ألي لزني نكتب هالتدوينة اليوم هو شعوري بالخطر على مصير بلادنا أمام هالأزمة ألي نعيشو فيها. الأزمة اليوم حسب تقديري الشخصي 3 أنواع سيدي خويا. عندنا أزمة ثقة وأزمة بهامة وأزمة مفاهيم . هو الحق فما أنواع أخرى وتجليات للازمة لكن ماهيش وقتها بش نحكي عليها.

أزمة الثقة موجودة على برشة مستويات، الناس ماعندهاش ثقة في بعضها وماعندهاش ثقة فالحكومة المؤقتة وهذا شي عندو أسباب واضحة الا وهي 23 سنة قمع وتشكيك. معقول ياسر أن التونسي يشكك فالحكومة هاذي رغم أننا نطرنا منها شوية مكتسبات وحاجات باهية لكن هالمكتسبات تجي ديمة بعد تشيح الريق والمظاهرات والاعتصامات وموش تجي منها هي بشكل عفوي يخلينا نعطيوها الثقة. كذلك أزمة الثقة والتشكيك ولات في بعضنا، ألي يعبر على رأي مخالف ننعته بالتجمعي والخائن والماسوني والملحد ! ولهنا تجي أزمة المفاهيم .

نرى في وليدات قاعدة تعطي في مفاهيم جديدة مانيش عارف منين يجيبوا فيها لكن نعرف اسبابها الا وهي أن السواد الأعظم من الشباب مايقراش حتى شطر كتاب في عشرية كاملة. صحيح الكلب المخلوع همش الشباب وقضالو على المادة الشخمة لكن توا يا أخي وبعد ماتحررنا لازمنا نرجعوا ننقدوا رواحنا ونحاولوا قبل ماننعتو العلمانيين بالإلحاد أننا نثبتو في معنى العلمانية ونقراو كتب مفيدة ونسمعوا الرأي و الرأي الأخر وبعد نعملوا الإختيار عن وعي. قبل مانسبوا الناس ونتهموهم بالتجمعيين نحاولو نطلعوا على تاريخهم وبعد نحكموا عليهم. قبل ماننعتو الناس بالرجعيين نسمعوهم ونخليو الأفكار المسبقة على شيرة ونكونوا عقلانيين ونخدمو الطاسة الي عطاهالنا ربي. صحيح هذا لكل يتطلب مجهود وبحث لكن هذا واجب سيدي خويا سينون شنوا الفرق بيننا وبين الحيوان الي مايخممش !

هالأزمتين الي حكيت عليهم ماينجموش يكونوا نابعين من فراغ ولا من بن علي وحده لكن من أزمة أخرى وهي الأخطر وكان قضينا عليها انجموا نقلصوا من حدة الأزمتين ألي حكيت عليهم. هالأزمة الأخطر هي أزمة البهامة حشاكم ولي برشة يعانيو منها. لازمنا نوعيوا بعضنا ونتناقشوا باللتي هي أحسن و نكونوا حضاريين في تعاملنا ونقاشنا مع بعضنا ونبقاو اليد فاليد كما كنا فالأيام الأولى بعد خلع زينوشي الي هرب منا.

أنا متفايل خير نشالله وربي معانا الكل.

vendredi 18 février 2011

أعلن رسمياً اني داخل في حيط


كنت نصبر في روحي شهر كامل ونقول لاباس تو تتحسن الأمور ومايدوم حال.

اليوم وملي قمت في نهار الجمعة الفضيل والأخبار تنهال عليا قريب تعملي إنهيار ! قمت حليت الحاسوب العزيز ثم وبعد اكسبريس وزوز سواجر والواحد مازال مرهوج قلت برى نشوف أخر الأخبار فإذا به خبر يحمم القلب نشالله ماهوش صحيح يفيد أن سي عبد الوهاب عبد الله فصع ! وكانت هذي القطرة إلي فيضتلي الكاس و جوجمتني عالصباح الفتاح ! برى نرجع للحكاية مالأول ونفسر موقفي.

أنا يا سيدي ماكنتش ضد الحكومة المؤقتة الأولى خاطر بيني وبين روحي قلت الشعب يد وحدة فايقلها وأي خروج على السطر من هالحكومة بش نفيقوا بيه ونرجعوها للثنية ياخي الشعب أبدى رفضه للحكومة هاذي وبعد إعتصام فالقصبة وإرضاءً لمطالب الشعب تشكلت حكومة جديدة أقل مايمكن نقول عليها أنها من أنظف الحكومات إلي عرفناها منذ الإستقلال ومافيهاش شلايك، لكن هالحكومة إلي عجبتني قامت بتعيين الولاة إلي اغلبهم تابعين للتجمع مما أدى إلى عودة المظاهرات والإعتصامات في كامل أنحاء البلاد، أيا قلت برى ميسالش في قالب غلطة ودفع الله ما كان أعظم و هاو وزير الداخلية قال مافماش مشكل نثبتو فيهم ونحيو إلي يقلقكم. بعد أيمات تفتق التجمع وقلنا سلكناها لكن كيفاش توا نعملوا مع البرلمان ومجلس المستشارين ؟ أكيد تو يفهموا رواحهم ويستقيلوا وسي المبزع بصفة الرئيس يعتمد المراسيم و يوفى زمان الطحين، لكن هالقفافة ألي معادش عندهم شرعية رفضو الفكرة و وراونا مستوى هابط ياسر فالحوار يندى له الجبين وخلاونا معادش فاهمين شي ! من جهة ماعندهم فالسوق مايذوقو والرئيس المؤقت يدبر في راسو بالمراسيم ومن جهة ياخذوا فالكروية على ركشتهم فالمجالس ... حاسيلو الدستور تشولق وشخصياً مانيش فاهم شي !

ثم بدء الإنفلات الأمني وحتى البوليسية النظاف ولاو خايفين من إستعمال الوسائل القانونية مع البلطجية ألي تروع فالناس، يقولك خويا أشلزني أنا تهبط تصاوري بعد فالفايسبوك ونولي مهدد كما صار مع رئيس منطقة الكاف ! وكثرت البراكجات و النصب العشوائية في شارع الحبيب بورقيبة وعمت الفوضى البلاد.

وتتواصل الهمجية ونشوفو مظاهرة قدام الكنيس اليهودي وتطرف وخور كبير، مaيهمنش كان هالمظاهرة عملوها تجمعيين ولا ناس بسم الدين، إلي يهمني أن العمل هذا يمس اليهود التوانسة ألي بطاقة التعريف متاعهم كيما بطاقتي مكتوب فيها الجنسية التونسية !

وبعد هالخور هذا نزيدو نسمعو بتسكير ماخور باجة والقيروان و غيرها وهذا الكل بسم الدين. واليوم نزيد نسمع بعملية حرق وخزعبلات قرب ماخور زنقة سيدي عبد الله ! و أنا ضد هالعملة ورايي كما راي صديقتي بنت طراد وموجود في هذه التدوينة

وأخر المؤسفات المبكيات نسمع بعملية قتل لراهب مسيحي، شخصيا نتصور الإسلاميين المتطرفين و رغم كل شي ماهمش وراء هالعملة والله أعلم ، المهم أن العمل المشين صار وجرى !

وأمام هالخور هذا الكل نقول شبي والدين التلفزة التونسية الخاصة والوطنية ساكتة علي صاير فالبلاد !!! شبي سماكم تواصلوا التعتيم وقتلي قلنا هاكم تحررتو !!! زايد من شب على شيء شاب عليه. كذلك نقول شبي مواقف الحكومة ضعيفة تكتفي بالتنديد ؟

حزني وألمي كبيران وربي يقدر الخير لما فيه مصلحة البلاد.

samedi 12 février 2011

محاورة سكيزوفرينية


شهر قريب يتعدى على رحيل الكلب بني كلب الزيبيدي، في شهر عشنا كل يوم حدث جديد واعتصامات ومظاهرات قد شعر الراس...

- ستنا شبيك داخل فرانتسي ! وين كنت عامين كاملين ؟

- اوو الحق هموم الدنيا جمدتلي طاست مخي ومعادش النجم نكتب

- امم فهمتك ! إي نعم فهمتك ! وبش نحاسبك عالغياب هذا بكل حزم والمتسببين فالجمود الفكري متاعك سيحاسبون !

- باهي سيبني خنحكي وفك على قتلي !

- دويو ! احكيلي وين غبرت فالعامين قبل !

- ما غبرتش ! موجود ناشط على الشبكة العنكبوتية ! عملت برشة صحاب :) كان ترى محلاهم ! على كل لون يا كريمة، إلي يحب البومزيود واللي يحب باخ و بيتهوفن واللي يحب الجاز ولي يحب تبس تبس ولي ولي ولي..

- إي حلو، وين لقيتهم هاذم ؟

- عالفايسبوك وتويتر :)

-مالا الجماعة لكل تحب الموزيكا ؟

- يعني تنجم تقول ، فما إلي دمدوم وفما ألي يسمع فالحس يأثث بيه فالصمت و برا..

- موش تحب السينما إنت ؟ مافماش شكون سينيفيل ؟

- إي فما برشة محلاهم عندهم ذوق رفيع وفما إلي يتفرج في فيلم ماعندو حتى معنى جيست تصاور ماشية جاية 24 مرة فالثانية..

- نعرفك اقصائي، شبيك وليت متسامح مع أصحاب الذوق الرديء ؟؟

- ياخي فما كان الفن يجمعنا مع الناس ؟ فما زادة حاجات أخرى

- فهمني مفهمتش!

- فما إلي تجمعني بيه علاقة الزندقة وفما إلي ولد بلادي وجهويات تلمنا وفما ألي ولد جمعية ويحب يسكر فالثنية في غياب السلطات الأمنية و فما الناس المحافظة ألي عندها معاملة أخلاقية ..

- مالا شطر صحابك الكل فساد من اتباع اللائكية !

-نعنبو إلي قراك فالمدرسة والكلية ! شبيها اللائكية ؟ كفر ياخي ؟

- هكا فيبالي ! فهمني كان عندك راي اخر

- ماك قلت فهمتني وفهمت الجميع ! أيا هاني سامحتك وبش نوسع بالي معاك..

- عيش خويا :)

- اللائكية يا عشيري هي أعلى درجات التعددية، الناس الكل وخيان عايشين في كنف الديمقراطية شعارها لا للإقصاء والأحزاب القروسطية..

- مالا مافماش خطر على ديننا لا يتنحى ؟

- لا بالعكس بش نخليو لكل واحد الحرية الدينية وباي باي للحقبة البنعلية !

- مانا مسلمين علاش مانعملوش جمهورية اسلامية ؟

- قول جملوكية خير ! كان ترجع للتاريخ تلقى ديما الأحزاب الدينية في جميع البلدان ترجعنا لتالي وتقضي عالإنسانية ...

- إسمع إنت بش تهبلني هربت بيا وعندي فكرة نحب نقولهالك مالعشية

- إي قول

- نسيتني بش نعلقلك على الجهويات والزندقة والجمعية !

- إي ماهو خلال 23 سنة مليانة بالطحين والقفة البنعلية تفرقنا كأولاد الحجلة ومعادش عندنا قضية !

- وشكونكم نتوما ؟ وشنية هالقضية ؟

- احنا أحلى شعب خلقتو الإنسانية، احنا الناس إلي عندهم الجنسية التونسية، احنا الناس ألي عطات الشعلة للدول العربية بش تعمل ديمقراطية :') وكانك عالقضية كل واحد كيفاش يراها المهم متمسش وتخل بالإنسانية وكيما قال باولو كويلهو
«Chacun de nous, en sa prime jeunesse, sait quelle est sa Légende personnelle.»

- مالا لكلكم توانسة وكل واحد عندو قضية ؟

- إي نعم لكلنا بنزرتية وصفاقسية وسواحلية لكلنا كافية و قصارنية و سليانية لكلنا جرابة وتوزرية لكلنا توانسة قضينا على بنعلي و بش نكملو القفافة و التجمعية ! اليد فاليد نخدمو على رواحنا وننهضو بدولتنا التونسية :)

- باهي كلامك أما وين ترى فيها الخدمة ؟

- مايدوم حال، تو توفى الحملة الإنتهازية :)

- باهي و ..

- نرجعلك بعد نكملو الركشة الإفتراضية توا نداء الواجب والقهوة تستنى فيا هههه